काठमाडौँ, २१ जेठ (एजेन्सी) — इरानका प्रभावशाली फरवार्ड सरदार आजमुन देशको सरकारप्रति ‘अलोयल’ (अबफादार) रहेको आरोप लागेपछि आगामी फिफा विश्वकपका लागि घोषित इरानको टोलीबाट बाहिरिएका छन्।

संयुक्त अरब इमिरेट्स (UAE) को शबाब अल-अहली क्लबबाट व्यावसायिक फुटबल खेल्दै आएका आजमुनले देशका शासकहरूलाई असन्तुष्ट पारेको रिपोर्टहरू सार्वजनिक भएका छन्। अमेरिका र इजरायलसँग इरानको जारी तनावका बीच आजमुनले गत मार्च महिनामा युएईका शासक मोहम्मद बिन रसिद अल मकटुमसँगको आफ्नो तस्बिर सामाजिक सञ्जालमा पोस्ट गरेका थिए। सोही तनावका क्रममा इरानले युएईका केही स्थानहरूमा समेत आक्रमण गरेको सन्दर्भमा आजमुनको उक्त कदमले इरानी सरकारलाई क्रुद्ध बनाएको विश्वास गरिएको छ।

देशका लागि ९१ खेलमा ५७ गोल गरिसकेका स्टार फरवार्ड आजमुनलाई इरानका मुख्य प्रशिक्षक आमिर घालेनोइले प्रारम्भिक टोलीमै समावेश गरेका थिएनन्। अन्ततः उनलाई अन्तिम टोलीबाट पनि बाहिर राखिएको छ।

अमेरिका, क्यानडा र मेक्सिकोले संयुक्त रूपमा आयोजना गर्न लागेको सन् २०२६ को विश्वकप जुन ११ देखि सुरु हुँदैछ। यसैबीच, राजनीतिक तनावका कारण इरानले विश्वकपका लागि आफ्नो मुख्य क्याम्प (बेस) मेक्सिकोमा सारेको छ। मेक्सिकोकी राष्ट्रपति क्लाउडिया सेनबाउमले अमेरिका इरानलाई आफ्नो देशमा राख्न इच्छुक नभएका कारण इरानले बेस सार्नुपरेको दाबी गरेकी छन्।

विश्वकपमा इरानले जुन १५ मा न्युजिल्यान्ड र जुन २१ मा बेल्जियमविरुद्ध लस एन्जलसमा खेल्ने तालिका छ भने जुन २६ मा इजिप्टविरुद्ध सियाटलमा प्रतिस्पर्धा गर्नेछ।

आजमुन टोलीमा नपरे पनि इरानको टोलीमा अन्य स्थापित खेलाडीहरू मेहदी तारेमी र अलिरोजा जहानबक्स भने समेटिएका छन्। ३३ वर्षीय तारेमी ग्रीक क्लब ओलम्पियाकोस र ब्राइटनका पूर्व विङ्गर जहानबक्स बेल्जियमको प्रो लिग क्लब डेन्डरबाट खेल्ने गर्छन्।