दोहा, २१ जेठ (सन् २०२६)कतार राष्ट्रिय फुटबल टोलीका मुख्य प्रशिक्षक युलेन लोपेटेगुईले आगामी फिफा विश्वकपका लागि आफ्नो अन्तिम २६ सदस्सीय टोलीको घोषणा गरेका छन्। यस टोलीमा देशका लागि सबैभन्दा धेरै गोल गर्ने कीर्तिमानी स्ट्राइकर अल्मोज अलीलाई पनि समावेश गरिएको छ।
कतारका लागि १२६ खेल खेल्दै ६० गोल गरिसकेका अली प्रशिक्षक लोपेटेगुईको रणनीतिमा मुख्य हतियार बन्ने अनुमान गरिएको छ। स्पेन, रियल म्याड्रिड, वुल्भ्स र वेस्ट ह्यामका पूर्व प्रशिक्षक समेत रहेका लोपेटेगुईले आफ्नो टोलीमा ९ जना फरवार्डहरूलाई ठाउँ दिएका छन्।
टोलीमा दुई पटकका ‘एसियन प्लेयर अफ द इयर’ विजेता अक्रम अफिफ पनि परेका छन्। सन् २०२२ को विश्वकपमा घरेलु मैदानमै आफ्ना सबै समूह चरणका खेलहरू हारेर खराब कीर्तिमान बनाएको कतार यस पटक विश्वमञ्चमा आफ्नो छवि सुधार्ने दाउमा छ। सन् २०२५ को मे महिनामा कतारको मुख्य प्रशिक्षक बनेका लोपेटेगुईले यसपटक टोलीलाई बलियो रूपमा प्रस्तुत गर्ने अपेक्षा गरिएको छ।
प्रशिक्षक लोपेटेगुईले प्रारम्भिक टोलीमा परेका ब्राइटनमा जन्मिएका पूर्व डनकास्टर तथा पिटरब्रोका डिफेन्डर नियाल म्यासनलाई अन्तिम टोलीमा स्थान दिएनन्। त्यस्तै, कतारका ४२ वर्षीय अनुभवी स्ट्राइकर सेबास्टियन सोरिया पनि टोलीमा अटाउन सकेनन्। सोरियाले कतारका लागि १२४ खेलमा ३९ गोल गरेका छन्।
कतार विश्वकपको समूह ‘बी’ मा रहेको छ। कतारले जुन १३ मा सान्ता क्लारा (अमेरिका) मा स्विट्जरल्याण्डविरुद्ध खेल्दै आफ्नो विश्वकप यात्राको सुरुवात गर्नेछ। त्यसपछि उसले सह-आयोजक क्यानडासँग भ्यानकुभरमा र बोस्निया-हर्जगोभिनासँग सियाटलमा प्रतिस्पर्धा गर्नेछ।
गोलकिपर: सलाह जकारिया (अल-दुहैल), महमुद अबुनादा (अल रयान), मिशाल बर्शाम (अल-सद्द्)।
डिफेन्डर: हाश्मी हुसेन (अल अरबी), अयुब अलावी (अल घाराफा), बौलेम खौखी (अल-सद्द्), पेड्रो मिगुएल (अल-सद्द्), इसा लाये (अल अरबी), लुकास मेन्डिस (अल-वाक्राह), सुल्तान अल-ब्रेक (अल-दुहैल), होमाम अल-अमिन (कल्चरल लियोनेसा)।
मिडफिल्डर: मोहम्मद अल-मानाई (अल शमाल), जसिम जाबेर (अल अरबी), करिम बौदियाफ (अल-दुहैल), अहमद फाथी (अल अरबी), अब्दुलअजिज हातेम (अल रयान), असिम मादिबो (अल-वाक्राह)।
फरवार्ड: तहसिन मोहम्मद (अल-दुहैल), एडमिल्सन जुनियर (अल-दुहैल), अल्मोज अली (अल-दुहैल), अक्रम अफिफ (अल-सद्द्), मोहम्मद मुन्तारी (अल घाराफा), युसेफ अब्दुलराजक (अल-वाक्राह), अहमद अला (अल रयान), हसन अल-हैदोस (अल-सद्द्), अहमद अल-जानाही (अल घाराफा)।
